Ischkolaschkiji taj ischkolaschtscha andar i flogoskeri grupn le Romendar ando ischkolakero di vodim on, aja hi i buti la Romengera-ischkolakera medijacijonatar le farajnistar Romano Centro. Aja aktiviteta imar buteder sar 20 berscha del. Adi, bojd 150 ischkolaschkijenge taj ischkolaschtschenge andar i flogoskeri grupn le Romendar ande 7 ischkoli Betschiste, pomoschim ol. Lenge akan jek kisetinipeskero mulatintschago dija.

O Roma-Butschu jek mulatintschago hi, savo o Burgenland-Roma imar sajt buteder sar 30 berscha mulatinen. O tradicijoneli Roma-Butschu, savo adabersch erschtivar ando Pradimo Kher Erba sina, muschika le burgenlanditike flogoskere grupnendar taj o mindenfelitiko la Romengera-muschikatar sikal. Jek premijera uso adaberschengero Roma-Butschu mulatintscha i dschilaschkija Ivana Ferencova lakere dschuvlengere choriha.

Use jek barikano muschikakero kirati akartscha o kulturakero farajn le austritike Romendar andi Devrientgaslina, ando 19to betschitiko gemajndakero becirk. O Andreas Sarközi taj o Christian Klippl khetan le but berschengere pomoschagoschtschen le farajnistar use jek muschikakero barikanipe akarde.

Le aunprindscharipeha le Romendar ojs flogoskeri grupn ando bersch 1993, i republika Austrija uso arakipe taj uso uprelikeripe le Romanesistar ojs falato le kultureli mindenfelitikostar la Austrijatar, terdschol. Uso 30-berschengero jubilejum jek artschijipe kerdo ulo, savo akan meg ando duj tschibtschakero gimnasijum Erbate te dikel hi taj savo jek dikipe ando mindenfelitiko, ando telschtaminipe taj ando entviklinipe la tschibtschatar del.

Romnjenge taj Romenge uso butjakero rodipe te pomoschinel – ada hi o cil le butjakere foroskere projektostar Prado Drom. Pasche berotinipeskere- taj kvalificirinipeskere diptscha te talaliniptscha del, save jek phurt maschkar o firmtscha, o sikadipeskere khera taj o Roma te kerel. Usi podijumakeri diskusija ando butschaschtschengero birovtschago Erba, Romengere-organisaciji jek dikipe pedar lengere butja dine.

Sar sako bersch ando 20to maj, o farajn Voice of Diversity ando Baranka park akartscha, khetan odole Lovarajenge taj Sintijenge te gondolinel, save adatar ledschim taj murdarde ule. O gondolipeskero mulatintschago akan imar o 16to var kerdo ulo. Khetan le dschidovtschenca taj le betschitikenca, o mindenfelitike kulturtscha mulatim taj famitlim ule.

Ande amari serija, „Upro jomi le naschade Romengere-sidlungtschendar“ ando Burgenland, papal upro rodipe pal Roma taj Romnja dschas, save anglo andlipe le nacijonalsocijalistschendar ando Burgenland ande sidlungtscha dschivnahi. Adi vakeras le Ludwig Zwickliha la „inicijativatar Erinnern Frauenkirchen“, savo pe la historijaha le Romendar ande Pamhagen ando norditiko Burgenland, donde beschartscha.

O artschijipe la organisacijatar Initiative Minderheiten ando betschitiko Flogoskero Kundejakero Museum upri dar le rechtsekstremi teroristar, savo le austritike tschuliptschen schtar berscha vodintscha, pal gondolinel. Ov le tematschenge la lilengera bombakera-serijake pe vidminel, savi ando berscha 1993 dschi 1996 la Austrija andi diha likerlahi taj schtar mule taj but igen phare dukade dschene angle antscha.